|
O “ACORDO UNITARIO
POR UNHA CARREIRA PROFESIONAL DIGNA”, consituido pola Coordinadora
Galega de Facultativos de Hospitais (CGFH), os sindicatos CIG, CCOO,
CSIF, OMEGA e UGT, e o Consello Galego de Colexios Médicos, reuniuse
en Santiago o día 1 de marzo de 2005. Entre as conclusións desa
xuntanza figuran as seguintes:
1.
A última proposta do SERGAS, que
presentou na Mesa Sectorial do 25/02/2005, supón un importante
progreso no proceso de achegamento de posicións entre a
administración e os profesionais. Esta nova proposta, a 5ª
presentada pola administración, fai cada vez máis real a
posibilidade de que se chege a asinar un pacto que permita a
existencia dunha Carreira Profesional (CP) digna para os
facultativos do sistema sanitario público galego.
2.
En contra do difundido desde
instancias situadas fora deste Acordo Unitario, na xuntanza da mesa
sectorial do 25/02/2005 non se asinou a acta de ningún pacto ou
acordo, pois aínda fican aspectos importantes por concretar na mesa
sectorial antes de que sexa posíble asinar nada, malia
que as últimas propostas sobre retribucións e duración da CP, que o
SERGAS presentou ese día, supoñen un importante achegamento ás nosas
pretensións. Ademais, neste mesmo
sentido, cómpre deixar tamén claro que, na mesa sectorial, en ningún
momento foi presentado nin se falou de ningún tipo de preacordo que,
seica, tería establecido a administración con algunha organización
sindical. Ese preacordo, ou é clandestino ou simplemente non existe.
3.
Son varios os problemas por concretar
e, entre eles, está a necesidade de que no texto final fique
claramente establecida a data en que se reanudarán as negociacións
sobre o réxime definitivo de CP.
Sen embargo, no
momento actual, o principal obstáculo para chegarmos a un final
feliz das negociacións sobre “o periodo transitorio” da CP é a
pretensión do SERGAS de exisir a cada profesional un determinado
nivel de cumprimento de obxectivos (o 75% ou o 70%), nos ultimos 5
anos.
Os procedementos de
avaliación de obxectivos que ven empregando o SERGAS para o
pagamento do Complemento de Productividade Variable (CPV) son, por
moitas razóns, amplísimamente cuestionados polos profesionais, que
os consideran cheos de arbitrariedade e falta de transparencia. De
ser aceptada, tal e como está formulada actualmente a posición do
SERGAS sobre este tema, poden quedar fora da CP, neste periodo
transitorio, unha número posíblemente importante de facultativos que
son excelentes profesionais, que en ningún caso merecen semellante
maltrato.
4.
O SERGAS ven
afirmando que non hai ningún interese oculto de carácter
economicista na súa actual posición sobre o cumprimento de
obxectivos. De ser esto certo, coidamos que será posíble concretar
algunha das fórmulas avanzadas na última xuntanza da Mesa Sectorial
para resolver o problema, co que desaparecería o principal obstáculo
que impide un remate feliz, en pouco tempo, das negociacións, e os
profesionais do SERGAS contaremos cunha CP digna.
2 de marzo de 2005
 |
