A Asociación Galega para a Defensa da Sanidade Pública considera preocupante a reacción do Sr Conselleiro de Sanidade ás mobilizacións de rexeitamento á Lei de Ordenación Sanitária de Galicia (LOSGA) recentemente aprobada polo Parlamento, reflectidas nunha entrevista a "El  Médico" que adxuntamos a esta nota. è

1.- Nela pretende facer crer que o rexeitamento á LOSGA foi protagonizado unicamente por un reducido grupo de resentidos que actúa desde a mala fé, malia que o mesmo día en que se aprobou a Lei se manifestaron fronte ao Parlamento centos de delegados sindicais de TODOLOS SINDICATOS DE GALICIA (corporativos e de clase) cos secretários xerais á cabeza. Pero o rexeitamento á LOSGA non só foi sindical xa que foi expresado por organizacións representativas de importantes colectivos sociais e profisionais como o Consello Económico e Social (agrupa a patronal e sindicatos), das principais organizacións de profisionais sanitários de todos os estamentos como o Consello de de Colexios de Médicos de Galicia, de Psicólogos, Fisioterapeutas, Sociedade de Medicina Familiar, de Saude Mental, etc, etc. O QUE O SR. CONSELLEIRO PRETENDE OCULTAR CON ISTO É O SEU TOTAL ISOLAMENTO E SOIDADE NA DEFENSA DA SUA LEI.

2.- Resulta ainda mais preocupante o argumento de que a LOSGA conta co apoio de 2.700.000 os galegos que non se manifestaron en contra, negando así calquera representatividade aos axentes sociais e as organizacións profisionais que representan a miles de traballadores e profisionais sanitários de acordo á Constitución. De acordo a esa lóxica a nosa ordenación xurídica e a nosa capacdade de representación democratica teria os dias contados.

3.- Non semella razoabel (e resulta case un insulto á intelixéncia), querer facer crer aos profisionais e á opinión pública que grande parte dos lideres das organizacións que expresaron o seu rexeitamento á LOSGA, lle manifestasen en privado o seu apoio. Por que ian ter un comportamento tan incongruente estas persoas? por medo a represálias?, ¡¡pero se quen teñen todo o poder coercitivo na sanidade galega é a Consellería!!.

4.- Algúns dos argumentos sobre as Fundacións Sanitárias fan pensar que a Consellería descoñece a realidade ou falta á verdade voluntáriamente como cando pon o exemplo de Extremadura ou o Pais Vasco cando nesas Comunidades non existe esa figura de xestión.

5.- A Asociación para a Defensa da Sanidade Pública é un colectivo que agrupa a profisionais que xestionan centros hospitalarios e de atenzón primária, detentan xefaturas de servizo, participan en actividades de elevada cualificación profisional en investigación, transplantes, presiden coléxios de médicos e organizacións profisionais, etc, etc, e son un dos colectivos con maior nível de compromiso e lealdade co sistema sanitário públco en Galicia, que non se merecen que o seu máximo resposnabel lles traten con tanto desdén e aparente desprezo.
Probabelmente o feito de tantos anos no poder e o sentimento de que non existe nengunha posibilidade de alternativa ao seu goberno fai que os máximos responsábeis da administración desprecen e ignoren as organizacións representativas de traballadores e usuários e utilicen argumentos falsos para rebater aos seus opoñentes.
O consenso e o acordo que deberían presidir as relacións sanitárias semellan seriamente ameazados.

Manuel Martín García
Portavoz da Plataforma Galega para a Defensa da Sanidade Pública
Secretário da Federación de Asociacións para a Defensa da Sanidade Pública